Bere
kamisetan Illarramendi jarri ordez Illarra jartzen zuelako mutilaren juzgu
txarra egina nengoen. Hutsalkeria neritzon. Ezjakinok hori daukagu txarra, ez
asmatzeagatik ez dugula asmatzen kulpa nori bota ere. Abizen osoa kamisetan
kabitzen ez zelako omen zen, ameto bada.
Ari
zaizkio Llorente izeneko bati juzgu okerragoak egiten! Sare sozialetan zioen Gipuzkoak
Madriden duen ordezkari politiko abertzale batek Bilbon ez ziola egunon bat bera
ere entzun eta Torinora iritsi orduko hasi zela italieraz. Kateak jarraitu
zion, gazteleraz ia dena, bada ez bada ere espainolazo ez deitzea hobe,
Athleticen ereserkia ez zekiela, euskararekiko errespetu falta, Euskadirekin ez
baina Espainiarekin jokatuko zukeela, ez ahazteko errioxarra, espainiarra
alegia, zela eta antzeko astaloreak. Bat nator hitz hauek gehienak lotsagarri
eta zekenak iruditzen zaizkienekin.
Garaiz
gaude, Gipuzkoarago joaz, horrelako jardun tristerik gabe moldatu behar dela
uste dugunok. Badirudi Illarramendiri futbol enpresaz irabazi handiz aldatzeko
aukera etorri zaiola. Mutila etxean eta etxeko nahi dugun bezalaxe, denok opa
behar genioke mutilari merezi duen onena bere bizimoduan, suertea bere aukeran,
edozein dela ere hau. Baina aleak ikusteko eta entzuteko gaudela esango nuke.
Aurrera
Illarra! Hala bada, penatxo!, baina izan suertea! Badu bere alde ona Real Madridek euskararen
ezagutza, eta erabilera, ligako altuenetakoa izateak ere. Irriño bati ezin diot
eutsi. Eta beste kontu bat, ea Gipuzkoako Ogasunekoek zer aurpegiera eta gogo
zintzorekin heltzen dioten lanari.
No hay comentarios:
Publicar un comentario