Jo dezagun nik esana kontutan ez
hartzea ulergarria dela. Ulergarria, hainbestetan gertatzen zaidalako eta gure gizartearen bizioak
hainbesterainoxe daudelako zabalduta. Ulergarria, baina ez onargarria. Arrazoi ematerik
ez dut eskatzen. Bakarren bat, edo bakarren batzuek, esaten dudanaz pentsatzen jar
daitezela eskatzen dut. Ez dut errudunik nahi eta behar, behar dudana, guztiok aurrera
egiteko soluzio edo konponbidea da.
Euskararen matrakarekin nator, euskaraz
gaurkoan, ez baitaukat gurean zabalduenak dauden usteetan ziurtasunik.
Euskaldunok geure buruak ondo, lasai eta normal ikusteko erdaldunek, edo
erdaldun askok, euskara ikastea, goiz ala berandu, ezinbesteko dugun ustetik
abiatuta, ez dakit ez ote ditugun erdaldunak eta euskaldun ugari euskaratik
uxatzen, euskaratik ihesi jartzen, euskaratik kanpora bultzatzen geurera ekarri
beharrean.
Negarra eta lantua jotzen ditugu,
errudunak hatz luze luzez seinalatu ere egiten ditugu, eta bizitza etsamina eta
azterketaz josten dugu, bete bete. Zenbat gazte ez ote dago euskara entzun eta
azterketa hitza duenik lehenbizi etortzen zaiona. Zenbat gazte euskaldun ez ote
dago besterik ia jakin ez eta mintzamenean edo beste edozein menetan EGAn
atzera bota dutena, hizkuntzarik ez daukala esan diotena. Erakunde publiko bateko
iragarki taula batean ikusi nuen atzo, hogeita bi izen, erdi mailako karrera
bat gutxienez zutenak, bakarra gai, hogeita bat ezgai, eta bat ez aurkeztua.
Zilegi al da ardura azterketa egin zutenena ala exijitzen dugunona den galdetzea?
Lo egoteko ez dago arima lurperatu beharrik.
No hay comentarios:
Publicar un comentario